Трекинг во Непал

-12.02.2010г., Челана Д.

До базниот камп на Анапурна

Челана Димитријевиќ, член на Алпинистичкиот клуб Шри Чинмој од Скопје, во јануари оваа година беше во Непал. Таму таа се запознала со Нимдома Шерпа и самостојно двете при крајот на месецот си направиле трекинг до базниот камп на Анапурна - кој се наоѓа на 4130мнв. Еве на кратко за случувањето:

„За време на престојот во Непал имав можност да се запознаам со Нимдома Шерпа. Таа во 2008 година стана најмладата девојка која се искачила на Еверест – на своја 17-годишна возраст. Најдолу под текстот и фотографиите има кратко видео за нејзе...

Од Катманду со мало автобусче тргнавме кон Покара. Овој град е лоциран во централниот дел на Непал и е трет по големина после Катманду и Биратнагар. Покара е една од најпопуларните туристички дестинации и се карактеризира со тивка и спокојна атмосфера која владее во него и по убавината на околната природа. Тоа што е значајно за него е што е на некој начин како база за сите експедиции чија цел е качување во планинскиот масив на Анапурна.

Од Покара на 20-ти Јануари со такси тргнавме кон Најапул кој се наоѓа на 1070мнв. Тука започна нашиот трекинг. Се искачивме до Гандрук и тука ја поминавме ноќта. Едноставноста и убавината на местата низ кои нé водеше патеката целостно нé исполни и ни го засили впечатокот за непроценливата вредност на Хималаите. Нашето качување нé водеше кон Чомронг (2170м), потоа кон Бамбу и до Дован (2870м). Овде ја поминавме втората ноќ. Тоа се мали селца со едноставни услови за преноќување. Гостопримството на тамошното население целосно ги освои нашите срца и покрај така едноставните и скромни услови за престој. Следниот ден продолживме – секој ден се движевме по 7-10 часа и уживавме во природата. Стигнавме до Деурали (3230м) и следниот ден планиравме да стигнеме до базниот камп.

И така, на 24-ти Јануари најпрво стигнавме до базниот камп на Мачапучаре (6998м) кој се наоѓа на 3700мнв и од каде што можевме да го видиме врвот на оваа планина, но и на Анапурна 3 (7535м) и Хиунчули (6441м), а по 4 часа стигнавме и до базниот камп на Анапурна... Бев запрепастена од погледот. Врвовите ме восхитија со нивната убавина: Анапурна 1 (8091м), Јужниот врв (7219м) и Мачапучаре (6998м)... Кај базниот камп поставивме молитвени знаменца - симбол за молитва и благослов карактеристичен за Хималаите.

Овде преспавме и следниот ден со силно темпо почнавме со симнување. По околу 10 часа, во 7 часот вечерта стигнавме во Чомронг на 2170мнв. Следниот ден беше порелаксиран – продолживме со симнување до Најапул, а од таму со такси до Покара...

Беше многу инспиративно да се направи овој трекинг и директно да се почувствува величенственоста и големината на Хималаите. До базниот камп на Анапурна стигнавме за 4 дена од Покара, а може да се стигне за 5 дена од Катманду. Овој трекинг е многу популарен, но во овој период од годината до базниот камп освен нас, стигнаа уште само 20-тина други луѓе, вклучувајќи тука и носачи...

Со голема благодарност до Нимдома Шерпа за сета инспирација и поддршка.