Насоката на соништата – во еден ден

Основни викенд-тренинзи за искачување на насоката Regular Route (Нормална Насока) на Half Doum ( Халф Доум) – или било која друга долга насока

- Текст од Тод Смит

Вовед

Само неколку насоки во светот се толку восхитувачки како Regular Route на Северо-западната страна на Халф Доум. Сместена во долината Јосемити, таа се издигнува 23 должини, има оцена VI и прв пат е искачена од Ројал Робинс, Џери Галвас и Мајк Шерик во период од пет дена во 1957 година. Од тогаш таа стана цел на стотици алпинисти – меѓу кои и јас.

Оваа насока во еден момент е искачена и за помалку од два часа, но брзото качување не е нешто што ми значи многу на мене како просечен качувач – ниту на Том Брескотер. Минатата година, качувајќи најмногу само за време на викендите и само неколку дена земени како одмор од работа, Том и јас успеавме да направиме наша верзија на „брзо качување“ на оваа насока на соништата – ја качивме за еден ден. Или поточно ни беа потребни четиринаесет часа.

Не качувавме слободно ништо потешко од 5.10 (видете споредбено колку е тоа по UIAA). Со добар тренинг, било кој викенд-качувач лесно може да биде и побрз од нашето време ако слободно качува до 5.9. Токму поради тоа го пишувам овој текст: тренинг за „брзо качување“ за алпинисти кои работат многу во текот на неделата.

Долго време, јас и Том работевме на различни техники за брзо качување и откривме дека некои „профи“ тактики не се изводливи од наша страна – кака на пример ризичното паралелно качување. Така ние направивме адаптација на тие тактики со наши „секојдневни“ стратегии.

Текстот е поделен во три дела: подготовки и тренинг, специфична стратегија за одделни должини на насоката и препорачана опрема.

Без разлика дали вашата цела е Халф Доум за еден ден или било која долга насока, следните совети и трикчиња ќе ви помогнат да станете побрзи и се надеваме дека нема да имате потреба да ја запалите челната лампа во последната должина...

Подготовки

Том и јас сакавме да ја поминеме слободно секоја должина. Знаевме дека ако се потпреме на техничко качување за кое понекогаш е потребно повеќе време, веројатно нема да стигнеме до врвот во еден ден. Поради тоа се подготвувавме да бидеме во одлична форма за слободно качување – не требаше да станеме само посилни туку и поиздржливи за да качуваме цел ден без прекин.

Качување на долги насоки – Качување на 23 различни насоки од по една должина може да биде одличен тренинг за сила за Regular Route, но тоа не е доволно добра подготовка за умот ниту пак за менувањето при водењето и на сидриштата за кое е потребно одредено време. Наместо тоа најдобро е да се најде некоја подолга насока која ќе се води со поставување на опрема и тука тренирајте за основите: добра физичка подготвеност, пронаоѓање на насоката, качување на експонирани 5.9 делови, качување со ранец и брзи промени на сидриштата.

Физичка подготвеност – На средно тешките должини на Халф Доум единствена работа која ќе ве успорува е ритамот на срцето. Тренирајте подобро – трчајте, пешачете по планини со ранец на себе и сл. Најмалку два пати во неделата.

Тренирајте на тешки насоки – Додека тренирате подигнувајте го вашето ниво на слободно качување. Треба да можете слободно да качувате делови од 5.9 и 5.10 на Regular Route. Затоа при тренингот качувајте 5.11-ки. Дури и да треба да виснувате од време на време на нив, следниот пат кога ќе поминувате 5.9 ќе биде многу полесно. Треба да водите делови од 5.10 – повеќето должини на Халф Доум се со тежина 5.9, но ќе бидете изморени поради тоа што ќе качувате брзо и тие ќе ви бидат потешки. Вежбајте различни проблеми со тежина 5.10

Вежбајте со опремата за Халф Доум – Качувајте насоки со една или повеќе должини со опремата која ќе ја носите на Халф Доум и така ќе бидете поподготвени со вашиот партнер да користите одредени делови од таа опрема или пак да бидете затекнати да немате доволно опрема.

Научете да качувате технички – По големиот дел од Regular Route се поминува слободно, но постојат делчиња како некои пречења и детали од 5.11 кои би требало да знаете да ги поминете и технички. Добра вест е тоа што овие делови на Халф Доум лесно се поминуваат на овој начин (само со лесно тегнење за опремата за да напредувате) поради тоа што тие се обилно обезбедени и нема да имате потреба да носите дополнителна опрема за техничко качување со вас. Од една точка на друга лесно се стигнува со прикопчување на карабинер или застанување на гуртна (на која ќе може да висите и ако треба да се одморите) и кога ќе се потегнете на нив ќе ја дофатите погорната точка.

Вежбајте го техничкото качување (како прв и втор во наврска) на насоки со една или повеќе должини и експериментирајте брзо да прикопчувате во точката над вас. Само по неколку должини ќе станете многу побрз во оваа техника која ќе ви дојде добро на Халф Доум. Еве ги должините каде има техничко качување на Regular Route :

4-та должина: Кратка фиксна скаличка од која по само неколку експанзиони се стигнува до полесен дел од 5.9 – овде можете да се влечете и на вашите гуртни.

10-та должина: Фиксна скаличка која завршува во дел од каде со занишување се стигнува до сидриштето (со експанзиони клинови)

12-та должина: овде може да се отиде и по полесен (но страшен) дел од 5.9+ по еден камин од лева страна или пак да се помине технички со многу фиксни точки дел кој е оценет како 5.11 c – вака прават повеќето наврски

18-та и 19-та должина: Овие две должини со оцени 5.11 d и 5.10d може да се качат технички како една долга должина.

20-та должина: 15-тина метри техничко качување со многу веќе поставена опрема

22-ра должина. Фиксна скаличка со пречење во средината на должината. Овде може со два комплети да се прикопчуваат експанзионите клинови над вас еден по друг а со нозете да се оди на триење.

Стратегија за насоката

Пристап – Ние одбравме да стигнеме еден ден пред качувањето и тоа по 17-тина километри долгата патека Mist Trail . Ова овозможува да спиете на источното рамо на Халф Доум – потребна е дозвола која се вади во Центарот во долината.

Само френдови – Најважна работа за да се забрза качувањето беше тоа што употребувавме само френдови за обезбедување. Тие лесно се поставуваат и вадат и колку помалку опрема се поставува на лесни должини – толку побрзо се движите. Земете дополнително и 6-7 мали и средни чокови...

Вториот со раница и јумар – Вториот во наврската треба да ја носи целата опрема на тимот во една мала раница за да му биде полесно на тој што води. Исто така вториот би било добро да има и јумар – така побрзо ќе ги минува потешките делови, а и воопшто е добро да се има таа алатка во случај ако се движите поспоро отколку што сте очекувале.

Паралелно – НЕ! – Од седмата до деветата должина тежината е 5.8 па и полесно. Планиравме овде да качуваме паралелно, но кога бевме на карпата тие делови ни се видоа потешки и одлучивме да се обезбедуваме. Генерално за побрзо качување добро е да се качува „во блокови“ – еден да води во континуитет по шест должини, а потоа да превземе другиот.

Качувањето во блокови има бројни предности: на алпинистите нема да има биде студено чекајќи и обезбедувајќи повеќе од една должина; водачот ќе „се загрее“, а вториот во наврската ќе има можност да се одмори подобро; промените на сидриштата ќе бидат брзи – водачот само ќе ја земе опремата од вториот и ќе почне да качува... Том и јас ја поделивме насоката на 5 блокови, при што јас како посилен качувач го зедов камините, а Том како подобар технички качувач ги зеде деловите кои ги поминувавме технички. Еве како направивме:

Блок 1; 1-6 должина: Јас го водев овој дел во кој имаше делови за слободно качување со оцена 5.9 и делови со оцена 5.10 и 5.11а кои беа со многу фиксни точки и кои лесно се поминуваа технички. (Запомнете дека ако сте преморени на некој дел, само поставете обезбедување и истегнете се до следната точка – поважно е постојано да се движите)

Блок 2; 7-12 должина: Делот на Том – слободно качување со оцена 5.9 а 10-тата и 12-тата должина технички.

Блок 3; 13-16 должина: Мој дел – камини со оцена до 5.9

Блок 4; 17-19 должина: Блокот на Том – техничко качување по таканаречените Цик-Цак пукнатини со тежина од 5.11 d .

Блок 5; 20-23 должина: Мој дел – комбинација на слободно и техничко качување. (овој блок го скративме за да може Том да го води делот со фиксната скала)

Психолошки добра работа во качувањето по блокови е тоа што кога имате 10 должини до врбот си велите дека имате уште еден-два блока до крајот наместо 10 должини.

Најслабата работа – сидриштата – Освен брзото качување важно е и брзо да ги поставувате сидриштата. Ако потрошите екстра 5 минути на секое сидриште тоа во целата насока со 23 должини значи 2ЧАСА!

Повеќето од сидриштата на Халф Доум се со експанзиони клинови – но не сите. Том и јас одлучивме на секое сидриште да ставаме по две точки за да направиме сидриште за помалку од една минута.

Брзо продолжување – собирање на јажето. Кога се качува во блокови водачот треба да го собира јажето на својата нога обезбедувајќи го вториот кој качува кон него. Кога вториот ќе дојде до сидриштето, крајот на првиот е најдолу во купчето собрано јаже. Тоа се режава само со превртување на купчето за да крајот на тој што води биде најгоре – за полесно давање на јажето. Затоа важно е тој што обезбедува да внимава како го собира јажето.

Исто така за побрзо продолжување со качувањето добро е опремата да биде поставена на гуртна поставена преку рамото. Така додека вториот се поставува на сидриштето, првиот може само да ја земе гуртната со целата опрема и да ја стави на неговото рамо. Вежбајте ги овие маневри на вашиот локалитет сé додека не го правите тоа да биде лесно под една минута.

Поврзувајте ги должините – Искачувањето ќе биде побрзо ако 13-тата и 14-тата должина го поврзете во една должина – на сидриштето измеѓу може да има гужва. Исто така може да се поврзат и 18-тата и 19-тата должина.

Не заглавувајте во камините – А- камините! Насоката има околу 150 метри во камини. Иако тежината никогаш не е поголема од 5.9, овие делови се веројатно најпроблематични за сите качувачи – многу повеќе отколку било кој друг дел. За тренинг – качувајте камини.

Носете скици од насоката – носете смалени и пластифицирани скици со вас во насоката и тоа две копии на разни места за да не ги изгубите.

Храна, опрема и облека

Храна и вода – Заедно имавме вкупно 3 литри вода во која имавме измешано прашкаста енергетска напивка и дополнителни 2 литра чиста вода. Во подножјето на насоката иам извор кој има вода во пролет и рано лето (распрашајте се дали има вода во периодот кога сакате да одите). Храна- јадевме пред да тргнеме, а со нас зедовме по 5-8 енергетски гелови за секого. Лесно се конзумираат при обезбедување. Некој може ќе сака да земе повеќе – научете да го слушате вашето тело при подготовките.

Опрема – Во насоката има многу поставена опрема во најтешките делови – дури и во камините па околу опремата е лесно:

2 комплети на френдови, 5 мали до средни чокови, 10 комплети, 4 гуртни со должина колку раката замоткани како за комплет, 4 гуртни со должина колку раката со по еден карабинер на нив, неколку слободни карабинери (избор), 4 лесни скалички, 1 гуртна со карабинер со матица за секого, 2 јумари, 60 метарско јаже (од 10мм) и 2 челни лампи. Комфорни патики за качување – ќе ги носите по цел ден без да ги вадите.