Шакшама

Анугата

Перу - 2007г

Македонскиот алпинист, Слободан Колоски - Шакшама, повторно е во Перу со американскиот алпинист Анугата Бах. Тие во изминативе години имаат направено неколку многу добри искачувања во Кордилерите и еве нивната соработка продолжува.

26.06.2007

Поради здравствени проблеми на Анугата, се откажуваат сите понатамошни планови за овој период - вклучувајќи го тука и обидот на Хуандој Норте. Не се работи за ништо сериозно - едноставно доволно за да не може да качуваат...

23.06.2007

По неколкуте дена одмор во Хуараз (Шакшама исто така имаше проблеми и со грлото), денес заминуваат кон базниот логор на Хуандој Северен Врв (6395м). Нивната цел е „Нормалната насока“ која се издигнува 1200 метри во вертикала и е со тежина D+. Од информациите кои ги имаат во овој период често во пристапот на насоката се случувале одрони и ќе поминат некој ден разгледувајќи ги случувањата под страната, но и во насоката. Насоката инаку започнува во кулоар со стрмнина 50-55 степени, а на излезот од него има 75 стпени. Потоа излегува на терен со стрмнина од 55 степени, и карпест дел со тежина III. Со нив ќе земат и шатор кој ќе го остават на излезот на кулоарот каде имало услови за тоа, а враќањето се прави по истата насока... Нивната насока е најдесната црвена линија на фотката...

Пред да започнат со посериозните искачувања, оваа година тие се решија аклиматизацијата да ја направат на планината Чопикалки (6354м).

18.06.2007
Имавме телефонски разговор со Шакшама и тој нé извести дека денес се вратиле од Чопикалки каде стигнале на висина од околу 150м под врвот. Базниот камп им бил на 4300мнв каде поминале 2 ноќи, а потоа уште 6 ноќи повисоко во планината од кои 3 ноќи на височина од над 5600мнв.
Врвот почнале да го качуваат во 2 часот по полноќ, но комбинацијата од многу силни ветрови во текот на денот, промена на условите на насоката од временските прилики (незгодни бергшрунди и креваси), како и самиот факт дека многу брзо се решиле да се искачат на таа височина – ги принудиле да решат да се вратат без да се качат до врвот и да не форсираат без потреба.

Се работеше сепак само за аклиматизација и е постигната добра височина. Сé уште конкретно не се знае на која насока би оделе и на која планина, но според сите информации кои ги добиле таму, условите во планините генерално биле многу добри...